12 – Laus et benedictio

Laus et benedictio sit
Dei Patris omnipotentiae
et admirandae Filii Dei sapientiae,
Spiritusque sancti paracleti
stupendae benevolentiae,
qua praevaluit, scivit
et dignata est Trinitas
semper veneranda
in salutis nostrae subsidium,
tam plenam omni gratia
Virginem formare,
cui superabundantiam
divinae suae beatitudinis
tam large communicaret,
ut gratiae omnes per ipsam
ad nos incessanter deriventur.
Intercede ergo pro nobis,
Virgo benedicta Maria,
qui tuam sanctam recolimus
cum affectu Nativitatem,
et tuos misericordes oculos
ad nos converte.
O clemens, o pia, o dulcis Virgo Maria.